سیکیورٹی فورسز نے خیبر پختونخوا کے مختلف 3 اضلاع میں خفیہ اطلاع پر کامیاب کارروائیاں کرتے ہوئے 4 دہشت گردوں کو ہلاک کر دیا، ہلاک دہشتگردوں کے قبضے سے اسلحہ اور گولہ بارود برآمد ہوا ہے، یہ دہشتگرد تخریب کاری کے مختلف واردات میں ملوث تھے ۔
پاک فوج کے شعبہ تعلقات عامہ کی جانب سے جاری بیان میں کہا گیا ہے کہ 17 اور 18 نومبر کے درمیان متعدد انٹیلی جنس بیسڈ آپریشنز کیے گئے ۔
آئی ایس پی آر کے مطابق سیکیورٹی فورسز نے دہشتگردوں کی موجودگی کی اطلاع پر ضلع باجوڑ میں آپریشن کیا، کارروائی کے دوران فورسز نے شرپسندوں کے ٹھکانے کو مؤثر انداز میں نشانہ بنایا جبکہ شدید فائرنگ کے تبادلے میں ایک دہشتگرد مارا گیا ۔
آئی ایس پی آر نے کہا کہ شمالی وزیرستان کے علاقوں سپین وام اور ذاکر خیل میں کیے گئے آپریشنز میں مزید 2 دہشت گرد مارے گئے، جبکہ ایک اور دہشت گرد ڈیرہ اسمٰعیل خان میں ہلاک ہوا ۔
بیان میں مزید کہا گیا کہ بھارتی حمایت یافتہ ہلاک دہشتگردوں سے اسلحہ اور گولہ بارود بھی برآمد کیا گیا، جو دہشت گردی کی متعدد سرگرمیوں میں ملوث تھے ۔
آئی ایس پی آر کے مطابق علاقے میں دیگر بھارتی حمایت یافتہ دہشتگردوں کی موجودگی کے خاتمے کے لیے کلیئرنس آپریشنز جاری ہیں، جبکہ سیکیورٹی فورسز اور پاکستان کی قانون نافذ کرنے والی ایجنسیاں نیشنل ایکشن پلان کی فیڈرل ایپکس کمیٹی کی جانب سے منظور کردہ ‘عزمِ استحکام’ کے وژن کے تحت بیرونی حمایت یافتہ دہشت گردی کے خاتمے کے لیے انسداد دہشت گردی آپریشنز پوری شدت کے ساتھ جاری رکھیں گی ۔
