خیبرپختونخوا کے ضلع لکی مروت میں سیکیورٹی فورسز نے خفیہ اطلاع پر کامیاب کارروائی کی ہے جس میں 4 دہشت گرد مارے گئے، ہلاک دہشتگرد متعدد وارداتوں میں ملوث تھے ۔
پاک فوج کے شعبہ تعلقات عامہ کی جانب سے جاری بیان کے مطابق سیکیورٹی فورسز نے 18 اور 19 فروری کی درمیانی شب ضلع لکی مروت میں خفیہ اطلاع کے بعد کامیاب آپریشن کیا ۔
آئی ایس پی آر نے بتایا کہ آپریشن دہشتگردوں کی موجودگی کی اطلاع پر کیا گیا اور کارروائی کے دوران فورسز نے ہدف کو مؤثر انداز میں نشانہ بنایا ۔
کارروائی کے دوران شدید فائرنگ کے تبادلے کے نتیجے میں 4 دہشتگردوں کو ہلاک کر دیا گیا جن کے قبضے سے اسلحہ اور گولہ بارود بھی برآمد کیا گیا ۔
آئی ایس پی آر کے مطابق دہشتگرد علاقے میں متعدد دہشت گردی کی کارروائیوں میں ملوث تھے جبکہ علاقے میں کسی بھی ممکنہ خطرے کے خاتمے کے لیے کلیئرنس آپریشن جاری ہے ۔
بیان میں کہا گیا کہ قومی ایکشن پلان کے تحت وفاقی ایپکس کمیٹی سے منظور شدہ وژن عزم استحکام کے تحت سیکیورٹی فورسز اور قانون نافذ کرنے والے اداروں کی انسداد دہشت گردی مہم پوری رفتار سے جاری رہے گی تاکہ ملک سے بیرونی سرپرستی میں ہونے والی دہشت گردی کا خاتمہ کیا جا سکے ۔
