خیبرپختونخوا کے دو مختلف علاقوں میں سیکیورٹی فورسز نے خفیہ اطلاع پر کامیاب کارروائیاں کی ہیں ، آئی ایس پی آر کے مطابق دونوں کارروائیوں میں 20 دہشت گردوں کو ہلاک کردیا گیا ۔
پاک فوج کے شعبہ تعلقات عامہ کی جانب سے جاری بیان کے مطابق 8 اور 9 نومبر کو خیبر پختونخوا میں دو الگ الگ آپریشنز کیے گئے، اس دوران بھارتی سرپرستی میں کام کرنے والے 20 دہشت گرد مارے گئے ۔
آئی ایس پی آر کا کہنا ہے کہ پہلی کارروائی شمالی وزیرستان کے علاقے شوال میں دہشت گردوں کی موجودگی کی خفیہ اطلاع پر کی گئی ۔
آئی ایس پی آر کے مطابق کارروائی کے دوران سیکیورٹی فورسز نے دہشتگردوں کے ٹھکانوں کو مؤثر انداز میں نشانہ بنایا، جس کے نتیجے میں بھارت کے حمایت یافتہ 8 دہشتگردجہنم واصل ہوگئے ۔
آئی ایس پی آر کا مزید کہنا تھا کہ دوسری کارروائی درہ آدم خیل کے علاقے میں کی گئی، جہاں شدید فائرنگ کے تبادلے کے بعد 12 دہشت گردوں کو ہلاک کیا گیا ۔
آئی ایس پی آر کے مطابق علاقے میں کلیئرنس اور سینیٹائزیشن آپریشنز جاری ہیں تاکہ کسی بھی باقی ماندہ بھارتی حمایت یافتہ دہشت گرد کو ختم کیا جا سکے ۔
ترجمان پاک فوج نے مزید کہا کہ پاکستان کی سیکیورٹی فورسز اور قانون نافذ کرنے والے ادارے قومی ایکشن پلان کے تحت فیڈرل ایپکس کمیٹی کی منظوری سے چلنے والے وژن ’عزمِ استحکام‘ کے تحت اپنی انسدادِ دہشت گردی مہم پوری قوت کے ساتھ جاری رکھیں گے، تاکہ غیر ملکی سرپرستی یافتہ دہشت گردی کے اس ناسور کو مکمل طور پر جڑ سے اکھاڑ پھینکا جا سکے ۔
