لاہور: ہماری قومی کرکٹ ٹیم کے شہرہ آفاق فاسٹ بولر شاہین شاہ آفریدی مداحوں کی تنقید پر ناراض دکھائی دیتے ہیں۔ انہوں نے پاکستانیوں سے اپیل کی ہے کہ اس مشکل وقت میں اپنی کرکٹ ٹیم کو سپورٹ کریں۔
یاد رہے کہ آئی سی سی ٹی ٹونٹی ورلڈ کپ 2024ء میں پاکستان کی کارکردگی پر مداح کافی ناراض ہیں اور ٹیم امریکہ اور بھارت کے خلاف میچ ہارنے کے بعد ٹورنامنٹ سے نکلنے کے قریب پہنچ چکی ہے۔ اگلے مرحلے میں پہنچنے کے لیے پھر سے اگر مگر کی صورتحال کا شکار ہے۔
شاہین آفریدی نے ایک سوشل میڈیا انٹرویو میں کہا کہ اچھے وقت میں آپ کو ہر کوئی سپورٹ کرتا ہے لیکن مداحوں کو چاہیئے کہ ٹیم کو برے وقت میں بھی سپورٹ کریں۔ لیفٹ آرمر نے مداحوں سے اپیل کی کہ ہم آپ کی ٹیم ہیں کوئی گلی کی کرکٹ ٹیم نہیں۔ ہم کوئی ایسی ٹیم نہیں ہیں جس میں پلیئرز کو سفارش کی بنیاد پر منتخب کیا گیا ہے۔ اگر آپ اس وقت ٹیم کو سپورٹ نہیں کریں گے تو آپ بھی میڈیا کی طرح ہی ہوں گے۔ انھوں نے یہ بھی انکشاف کیا کہ میں نے شاہد آفریدی سے کافی مدد لی ہے اور معین خان اکیڈمی میں اپنی بیٹنگ پر کافی کام کیا ہے۔ شاہین آفریدی کا کہنا تھا کہ میرا کردار یہ ہے کہ آخری کے اوورز میں باؤنڈریز لگاؤں اس لیے میں زیادہ تر اسی چیز کی پریکٹس کرتا ہوں۔
