شانگلہ : (تحسین اللہ تاثیر) کروڑہ ٹو اجمیر روڈ کی عدم تعمیر پر مقامی لوگ سڑکوں پر نکل آئے اور بھرپور احتجاج ریکارڈ کیا، مظاہرین نے بشام سوات روڈ کو دو گھنٹے تک ٹریفک کے لئے بند کئے رکھا،جس سے گاڑیوں کی قطاریں لگ گئیں۔
شانگلہ میں کروڑہ اجمیر سڑک کی عدم تعمیر کے حوالے سے احتجاجی مظاہرے میں ہزاروں افراد نے شرکت کی، مظاہرین کا کہنا تھا کہ جب تک ہمارے مطالبات منظور نہیں ہوتے احتجاج جاری رہے گا۔
مقامی لوگوں نے کہا کہ کروڑہ ٹو اجمیر سڑک کا منصوبہ ایک سال پہلے منظور ہوا ، لیکن ابھی تک کام شروع نہیں ہوا۔
احتجاج کی وجہ سے بشام سوات روڈ کی بندش سے سینکڑوں مسافر پھنس کر رہ گئے، ضلعی انتظامیہ کے یقین دہانی کے بعد مظاہرین نے احتجاج ختم کردیا لیکن دھمکی دی کہ اگر جلد سڑک پر تعمیراتی کام شروع نہیں ہوا تو وہ احتجاج کا دائرہ وسیع کریں گے۔
