ریاض: وفاقی وزیرِ آئی ٹی و ٹیلی کمیونیکیشن شزہ فاطمہ خواجہ نے ریاض میں منعقدہ عالمی ٹیکنالوجی نمائش لیپ 2026 میں شرکت کی۔
شزہ فاطمہ خواجہ نے ٹیک ڈیسٹنیشن پاکستان پویلین کا افتتاح بھی کیا۔
پویلین میں 25 سٹارٹ اپس اور 50 سے زائد پاکستانی ٹیکنالوجی کمپنیوں نے اپنی مصنوعات، ڈیجیٹل صلاحیتوں میں جدت اور ٹیکنالوجی کے ایکو سسٹم کو پیش کیا۔
وفاقی وزیر نے خطاب کرتے ہوئے کہا کہ پاکستان ڈیجیٹل تبدیلی کے سفر میں تیزی سے آگے بڑھ رہا ہے۔
وفاقی وزیر نے کہا کہ حکومت کا مقصد ملک کو ایک مضبوط ڈیجیٹل معیشت اور عالمی ٹیکنالوجی مرکز بنانا ہے۔
نمائش کے موقع پر شزہ فاطمہ خواجہ نے سعودی عرب، الجزائر، جنوبی کوریا اور دیگر ممالک کے وزرا اور ٹیکنالوجی اداروں کے حکام سے مختلف ملاقاتیں بھی کیں۔
اس موقع پر پاکستان اور سعودی عرب کی نیشنل سائبر سیکیورٹی اتھارٹی کے درمیان سائبر سیکیورٹی تعاون کے فروغ کے لیے مفاہمتی یادداشت پر بھی دستخط کیے گئے۔
