اسلام آباد: وزیراعظم محمد شہباز شریف سے ایشیائی انفراسٹرکچر انویسٹمنٹ بینک (AIIB) کی صدر محترمہ زو جیا یی نے ایک اعلیٰ سطحی وفد کے ہمراہ ملاقات کی۔
وزیراعظم نے پائیدار اور جامع اقتصادی ترقی کے لیے حکومت کی ترجیحات پر روشنی ڈالی۔
فریقین نے پائیدار ترقی، علاقائی انضمام اور اقتصادی نمو کے فروغ کے لیے باہمی تعاون کو مزید وسعت دینے اور قریبی اشتراکِ عمل جاری رکھنے کے عزم کا اعادہ کیا ۔
وزیراعظم نے AIIB کی صدر کو عہدہ سنبھالنے کے بعد اپنے مشاورتی دورے کے سلسلے میں پاکستان میں پہلی مرتبہ آمد پر خوش آمدید کہا۔
انہوں نے اس امر پر زور دیا کہ پاکستان، AIIB کے بانی اراکین میں شامل ہونے کے ناطے، بینک کے ساتھ اپنی شراکت داری کو نہایت اہمیت دیتا ہے۔
وزیراعظم نے پاکستان کی سماجی و اقتصادی ترقی کے لیے AIIB کی مسلسل معاونت کو سراہا۔
وزیراعظم نے پائیدار اور جامع اقتصادی ترقی کے لیے حکومت کی ترجیحات پر روشنی ڈالی۔
ایشیائی انفراسٹرکچر انویسٹمنٹ بینک کی صدر نے حکومتِ پاکستان اور عوام کی جانب سے وفد کی پرتپاک میزبانی پر شکریہ ادا کیا۔
انہوں نے بینک کے قیام کے دوران پاکستان کے اہم کردار کا ذکر کرتے ہوئے ادارے کے ابتدائی مرحلے میں پاکستان کی قیادت، بالخصوص اُس وقت کے وزیر خزانہ اور وزیراعظم پاکستان کی جانب سے فراہم کی گئی حمایت اور خدمات کو سراہا۔
انہوں نے وزیراعظم شہباز شریف کی قیادت کی تعریف کرتے ہوئے پاکستان کی ترقی اور خوشحالی کے لیے ان کے مضبوط عزم کو بھی خراجِ تحسین پیش کیا۔
دوطرفہ تعاون کو مزید مستحکم بنانے کی ضرورت پر زور دیتے ہوئے انہوں نے کہا کہ بینک پاکستان کے اسٹریٹجک شعبوں میں منظم انداز میں معاونت فراہم کرنے میں گہری دلچسپی رکھتا ہے۔
محترمہ زو جیا یی نے اس بات پر زور دیا کہ AIIB پاکستان کے ساتھ مختلف شعبوں میں تعاون کو مزید وسعت دینا چاہتا ہے.
دونوں جانب سے پائیدار ترقی، علاقائی انضمام اور اقتصادی نمو کے فروغ کے لیے باہمی تعاون کو مزید وسعت دینے اور قریبی اشتراکِ عمل جاری رکھنے کے عزم کا اعادہ کیا گیا.
