سکردو ( ندیم خان) گلگت جانے والی سیاحوں کی گاڑی گزشتہ روز سے لاپتہ ہے، گاڑی میں 4 افراد سوار ہیں جن کا تعلق پشاور سے بتایا جا رہا ہے، پولیس نے سیاحوں تلاش شروع کردی ۔
تفصیلات کے مطابق کچورہ شنگریلا سے گلگت جانے والی سیاحوں کی ایک گاڑی لاپتہ ہو گئی، گاڑی میں سوار چار افراد سے گزشتہ صبح سے رابطہ منقطع ہے جبکہ لاپتہ گاڑی میں خواتین اور بچہ سمیت 4 افراد سوار ہیں جن کا تعلق پشاور سے ہے ۔
گاڑی سے آخری رابطہ اتوار کے روز صبح ہوا تھا، جس کے بعد ان کا فون بند ہو گیا اور اہل خانہ اور متعلقہ حکام سے رابطہ منقطع ہوگیا ۔
خاندان والوں نے وزیر اعلی گلگت بلتستان اور امدادی اداروں سے مدد کی اپیل کی ہے،رابطہ نہ ہونے کی خبر سامنے آتے ہی ریسکیو ، ٹورسٹ پولیس اور ضلعی انتظامیہ نے تلاش شروع کردی ہے ۔
واضح رہے کہ گزشتہ ماہ بھی ایک افسوسناک واقعہ میں پنجاب کے شہر گجرات کے سیاح لاپتہ ہوکر حادثہ کا شکار ہوئے تھے ۔
حکام نے عوام سے بھی اپیل کی ہے کہ اگر کسی کو گاڑی یا لاپتہ افراد کے حوالے سے کوئی اطلاع ہو تو فوری طور پر قریبی پولیس اسٹیشن سے رابطہ کریں ۔
