اسپیکر قومی اسمبلی سردار ایاز صادق سے گورنر خیبر پختونخوا فیصل کریم کنڈی نے پارلیمنٹ ہاؤس اسلام آباد میں ملاقات کی۔ ملاقات میں ملک کی مجموعی سیاسی صورتحال، قومی معاملات، پارلیمانی امور اور وفاق و صوبوں کے درمیان ہم آہنگی سے متعلق مختلف پہلوؤں پر تفصیلی تبادلۂ خیال کیا گیا۔
اس موقع پر اسپیکر قومی اسمبلی سردار ایاز صادق نے کہا کہ جمہوری نظام کے استحکام کے لیے تمام آئینی اور قانون ساز اداروں کے درمیان مشاورت اور باہمی تعاون ناگزیر ہے۔ انہوں نے کہا کہ پارلیمنٹ ملک کے عوام کی امنگوں کی حقیقی ترجمان ہے اور قومی مفاد میں قانون سازی اور پالیسی سازی کا عمل باہمی اتفاقِ رائے سے آگے بڑھایا جانا چاہیے۔
سردار ایاز صادق نے مزید کہا کہ وفاق اور صوبوں کے درمیان مضبوط رابطہ اور تعاون ملکی استحکام، ترقی اور عوامی فلاح کے لیے نہایت اہم ہے، اور اس سلسلے میں پارلیمنٹ اپنا مؤثر کردار ادا کرتی رہے گی۔
ملاقات کے دوران گورنر خیبر پختونخوا فیصل کریم کنڈی نے پارلیمنٹ کے کردار کو سراہتے ہوئے کہا کہ خیبر پختونخوا وفاق کے ساتھ مل کر جمہوری اقدار کے فروغ اور عوامی مسائل کے حل کے لیے اپنا بھرپور کردار ادا کرتا رہے گا۔ انہوں نے کہا کہ وفاق اور صوبوں کے درمیان قریبی تعاون ہی ملک کو درپیش چیلنجز سے نمٹنے کا مؤثر ذریعہ ہے۔
