ٹی ٹوئنٹی ورلڈ کپ میں ایک بار پھر قومی ٹیم سیمی فائنل کی دوڑ سے باہر ہو گئی، پاکستان کو212 رنز کے جواب میں سری لنکا کی ٹیم کو147 رنز پر آؤٹ کرنا تھا، لیکن میزبان ٹیم نے شاندار کھیل پیش کرتے ہوئے مقررہ اوورز میں 207رنز بنا ئے، قومی ٹیم پانچ رنز سے میچ جیتنے کے باوجود سیمی فائنل تک نہ پہنچ سکی، جبکہ اس ناکامی کے بعد نیوزی لینڈ کی ٹیم سیمی فائنل کے لیے کوالیفائی کر گئی ۔
سری لنکا کے پالے کیلے سٹیڈیم میں کھیلے گئے میچ میں پاکستان نے پہلے بیٹنگ کرتے ہوئے مقررہ اوورز میں8 وکٹوں کے نقصان پر 212رنز بنائے ۔
پاکستان کی جانب سے اوپنرز صاحبزادہ فرحان اور فخر زمان نے شاندار بیٹنگ کی، صاحبزادہ فرحان نے سنچری سکور کی جبکہ فخر زمان نے 84 رنز بنائے، دیگر بیٹرز میں خواجہ نافع 2، شاداب خان 7، محمد نواز اور کپتان سلمان آغا صفر، شاہین شاہ آفریدی 4 اور عثمان خان 8رنز بنا سکے ۔
سری لنکا کی جانب سے دلشان نے 3 اور شناکا نے2 وکٹیں حاصل کیں ۔
ہدف کے تعاقب میں سری لنکا نے مقررہ اوورز میں 6 وکٹوں کے نقصان پر207رنز بنائے اور پانچ رنز سے میچ ہار گئی، تاہم قومی ٹیم میچ جیتنے کے باوجود سیمی فائنل کی دوڑ سے باہر ہو گئی ۔
پاکستان کو سیمی فائنل میں جگہ بنانے کے لیے سری لنکا کو 147 رنز تک محدود رکھنا اور کم از کم 64 رنز سے فتح حاصل کرنا ضروری تھا، تاہم ناکامی کے بعد نیوزی لینڈ نے سیمی فائنل کے لیے کوالیفائی کر لیا ۔
پاکستان کی جانب سے ابرار احمد نے 3 جبکہ شاہین شاہ آفریدی، نسیم شاہ اور محمد نواز نے ایک، ایک وکٹ حاصل کی، سری لنکا کے کپتان داسن شناکا نے جارحانہ 76رنز بنائے جبکہ رتھنیائکے نے 58 رنز سکور کیے، شاندار سنچری سکور کرنے پر صاحبزادہ فرحان میچ کے بہترین کھلاڑی قرار پائے ۔
