ٹی 20 ورلڈ کپ میں 9 جون کو نیویارک میں روایتی حریفوں کے پاکستان اور بھارت ٹاکرے کا پوری دنیا شدت سے انتظار کر رہی ہے اس حوالے سے آئی سی سی نے بڑا فیصلہ کیا ہے۔
ٹی ٹوئنٹی ورلڈ کپ 2024 شروع ہونے میں صرف چند دن ہی باقی رہ گئے ہیں۔ یکم جون سے ویسٹ انڈیز اور امریکا کی مشترکہ میزبانی میں میگا ایونٹ شروع ہو جائے گا جس میں پہلی دفعہ ریکارڈ 20 ٹیمیں شرکت کر رہی ہیں تاہم اس کے پرعکس دنیا بھر بالخصوص کرکٹ کے شائقین کو ٹورنامنٹ کے سب سے بڑے مقابلے پاک بھارت میچ کا شدت سے انتظار ہے جو کہ 9 جون کو نیویارک کے ناساؤ کاؤنٹی کرکٹ اسٹیڈیم میں کھیلا جائے گا۔
پاک بھارت میچ کی اہمیت کو انٹرنیشنل کرکٹ کونسل (آئی سی سی) بھی جانتی ہے اسی وجہ سے اس نے اس بڑے میچ کے لیے کئی ممالک میں شائقین کرکٹ کے لیے مقامی اسٹیڈیمز میں فین پارک بنانے کا فیصلہ کیا گیا ہے۔جن ممالک میں ان فین پارک کو بنایا جائے گا،ان میں پاکستان کے علاوہ بھارت، جنوبی افریقہ، امریکا اور برطانیہ شامل ہیں۔
رپورٹ کے مطابق پاکستان میں راولپنڈی کرکٹ اسٹیڈیم میں آئی سی سی کی طرف سے فین پارک بنایا جائے گا اور بڑی اسکرین کو نصب کیا جائے گا۔ یہاں مقامی شائقین کرکٹ نیویارک سے ہزاروں کلومیٹر دور اپنی ٹیم کے میچ کا اسٹیڈیم میں دیکھنے کا مزا لے سکیں گے۔اسی طرح راولپنڈی کے علاوہ بھارت میں نئی دہلی، جنوبی افریقہ میں جوہانسبرگ، برطانیہ میں برمنگھم اور امریکا میں نیویارک کے علاوہ ٹیکساس میں فین پارک بنائے جائیں گے۔ان فین پارک کو میچ سے 90 منٹ قبل شائقین کرکٹ کے لیے کھول دیا جائے گا اور اس کے ساتھ ہی میچ ختم ہونے کے ایک گھنٹے بعد تک یہ فین پارک کھلے رہیں گے۔
