عام انتخابات کا ایک سال مکمل ہونے پر تحریک انصاف کا صوابی میں جلسہ، حکومت پر سخت تنقید

عام انتخابات کو ایک سال مکمل ہوگیا ہے، جس پر پی ٹی آئی کی جانب سے صوابی میں جلسے کا انعقاد کیا گیا اور یوم سیاہ منایاگیا ،اس موقع پر پی ٹی آئی رہنماوں نے وفاقی حکومت کپر سخت تنقید بھی کی ۔

صوابی جلسے سے صوبائی صدر جنید اکبر کا خطاب:

صوابی میں جلسے سے خطاب میں پی ٹی آئی خیبرپختونخوا کے صدر جنید اکبر نے کہا  ہے کہ وہ یہ بات واضح کرنا چاہتے ہیں کہ اداروں اور عوام میں فاصلے بڑھ رہے ہیں، ہم ان اداروں کو اپنا مانتے ہیں ، آپ کے اور عوام کے درمیان فاصلے ہیں جو ملک کے لیے بھی خطرناک ہے اور آپ کے لیے بھی ۔

جنید اکبر نے کہا کہ ہم نہیں چاہتے کہ اداروں سے ہمارا ٹکراؤ ہو کیونکہ یہ ادارے ہمارے ادارے ہیں، اس بار عمران خان جب بھی کال دیں گے پہلے سے زیادہ تعداد میں حاضر ہوں گے اور اس بار ہم گولیوں کی تیاری کے ساتھ آئیں گے ۔

انھوں نے کہا کہ اس بار جب بھی آئے پہلے سے زیادہ تیار ہو کے آئیں گے، ہمیں بھاگنے کے طعنے دینے والوں سے کہتا ہوں کہ ہمیں معلوم ہے کہ کون کون بھاگا ہے، کیونکہ یاسمین راشد سمیت کتنے قائدین گرفتار ہیں تو جب آپ انھیں نہیں توڑ سکے تو کیسے ہمارے کارکنوں کو توڑیں گے ۔