لاہور: سہ ملکی سیریز کے پہلے میچ میں نیوزی لینڈ نے قومی ٹیم کو 78 رنز سے شکست دیدی، مہمان تیم نے پہلے کھیلتے ہوئے مقررہ اوورز میں پاکستان کو جیت کیلئے 331 رنز کا ہدف دیا تھا ۔
مقررہ ہدف کے تعاقب میں قومی ٹیم 252 رنز بنا سکی، فخر زمان نے 84 رنز کی اننگز کھیلی ،سلمان آغا40 اور طیب طاہر 30رنز بنانے میں کامیاب رہے ۔
نیوزی لینڈ ٹیم کی دو وکٹیں گرنے کے بعد کین ولیمسن اور ڈیرل مچل نے ذمہ داری سے ٹیم کا سکور آگے بڑھایا تاہم 134 کے مجموعی سکور پر شاہین شاہ آفریدی نے کین ولیمسن کو 58 رنز پر آؤٹ کیا اور اس کے بعد ٹام لیتھن بغیر کوئی رن بنائے پویلین لوٹ گئے ۔
ڈیرل مچل اور گلِن فلپس کی ذمہ دارانہ بیٹنگ کی بدولت نیوزی لینڈ نے مقررہ 50 اوورز میں 6 وکٹوں کے نقصان پر 330 رنز بنائے ،گلین فلپس نے ناقابل شکست 106 رنز کی جارحانہ اننگزکھیلی اور 72 گیندوں پر سنچری بنائی جبکہ ڈیرل مچل 81 رنزبناکرنمایاں رہے ۔
پاکستان کی جانب سے شاہین آفریدی نے تین وکٹیں حاصل کیں، ابراراحمد دو اور حارث رؤف نے ایک کھلاڑی کوآؤٹ کیا،حارث رؤف اپنے ساتویں اوور کے دوران درد کے باعث گراؤنڈ سے باہر چلے گئے ۔
ہدف کے تعاقب میں فخر زمان نے اننگز کا جارحانہ آغاز کیا لیکن ان کا ساتھ کوئی نہ دے سکا، بابر اعظم 10، کامران غلام 18 اور محمد رضوان تین رنز بنا کر لوٹ گئے ۔
فخر زمان بھی 69 گیندوں پر 84 رنز بنا کر ہمت ہار گئے، اس کے بعد سلمان آغا 40 ، طیب طاہر 30 کے ساتھ نمایاں رہے، پاکستان کی پوری ٹیم 252 رنز بنا کرآؤٹ ہوگئی، حارث رؤف بیٹنگ کیلئے نہ آ سکے اور یوں گرین شرٹس کو 78 رنز سے شکست کا سامنا کرنا پڑا ۔
میٹ ہینری اور سینٹنر نے تین، تین، بریسویل نے دو وکٹیں حاصل کیں،شاندار 106رنز بنانے پر گلِن فلپس میچ کے بہترین کھلاڑی قرار پائے ۔
تین ملکی سیریز کا دوسرا میچ نیوزی لینڈ اور جنوبی افریقہ کے درمیان پیر کو لاہور میں کھیلا جائے گا ،پاکستان اپنا دوسرا میچ بدھ 12 فروری کو جنوبی افریقہ کے خلاف کھیلے گا ۔
