اپردیر میں پولیس نے خفیہ اطلاع پر دہشت گردوں کے خلاف بڑا مشترکہ آپریشن کیا۔ کارروائی کے دوران فائرنگ کا شدید تبادلہ ہوا جس میں پانچ دہشت گرد مارے گئے۔ تاہم فائرنگ کی زد میں آ کر پانچ پولیس اہلکار زخمی جبکہ ایک مقامی شہری شہید ہوگیا۔
ڈسٹرکٹ پولیس آفیسر (ڈی پی او) اپردیر کے مطابق فتنہ الخوارج کے خلاف یہ آپریشن گزشتہ روز سے مختلف علاقوں میں جاری تھا جو رات گئے تک جاری رہا۔ آپریشن تحصیل دیر کے علاقوں دوبندو، بریکوٹ، سلام کوٹ اور ہاتن درہ میں کیا گیا۔ ان کارروائیوں میں مجموعی طور پر پانچ دہشت گرد ہلاک ہوئے۔
پولیس کے مطابق اس آپریشن میں سلام کوٹ کا رہائشی ایک شہری بھی شہید ہوگیا جبکہ آٹھ پولیس اہلکار زخمی ہوئے۔ شہید شہری یار محمد کی نمازِ جنازہ رات گئے پولیس لائن میں ادا کردی گئی۔
پولیس حکام کا کہنا ہے کہ ہلاک ہونے والے دہشت گرد 14 اگست کی رات پناہ کوٹ دیر میں پولیس وین پر ہونے والے حملے میں ملوث تھے۔ اس حملے میں تین پولیس اہلکار شہید اور چھ زخمی ہوئے تھے۔
ادھر ہنگو میں بھی دہشت گردوں نے دوآبہ پولیس اسٹیشن کی حدود میں طورہ وڑی کے مقام پر ایف سی قلعے کو نشانہ بنایا۔ فائرنگ اور دھماکوں سے دو ایف سی اہلکار شہید اور سترہ زخمی ہوگئے۔
اسی روز بنوں میں بھی دہشت گردی کی کارروائی پیش آئی۔ چوکی درے پل پر موٹر سائیکل سوار نامعلوم افراد نے دستی بم سے حملہ کیا جس کے نتیجے میں نائب چوکی انچارج زخمی ہوگئے۔
