ضلع اورکزئی تھانہ غلجو کے حدود میں پولیس چیک پوسٹ پر دہشتگردوں کے حملے میں سب انسپکٹر عنایت شہید ہو گئے ، پولیس نے جواں مردی کے ساتھ مقابلہ کرتے ہوئے حملے کو پسپا کر دیا ہے
ڈسٹرکٹ پولیس آفیسر شوکت علی نے بتایا کہ اپر اورکزئی تھانہ غلجو کے قریب کڑاپہ چیک پوسٹ پر دہشتگردوں نے بھاری اور خود کار ہتھیاروں سے حملہ کیا ۔
ڈی پی او کے مطابق دہشتگردوں کے حملے کے فوری بعد پولیس نے بہادری کے ساتھ مقابلہ کرتے حملے کو پسپا کرکے بھاگنے پر مجبور کیا ۔
دہشتگردوں کے حملے میں فائرنگ کے دوران سب انسپکٹر عنایت خان شہید ہو گئے، اطلاع ملتے ہی پولیس اور فرنٹئیر کور کی بھاری نفری موقع پر پہنچ گئی ۔
دہشتگرد رات کی تاریکی کا فائدہ اٹھاتے ہوئے پہاڑوں کی طرف بھاگ نکلے، پولیس اور فرنٹئیر کور اورکزئی اسکاوٹس کا مشترکہ سرچ آپریشن جاری ہے ۔
