جنگی جنون میں مبتلا بھارت کو پاکستان کے خلاف جارحیت کا منہ توڑ جواب مل گیا ہے۔ معروف بین الاقوامی جریدے "دی ڈپلومیٹ” نے اپنی تازہ رپورٹ میں تسلیم کیا ہے کہ پاک بھارت حالیہ کشیدگی میں پاکستان نہ صرف عسکری بلکہ سفارتی محاذ پر بھی کامیاب رہا۔
رپورٹ میں کہا گیا ہے کہ بھارت کو نہ صرف میدانِ جنگ میں منہ کی کھانی پڑی بلکہ سفارتی سطح پر بھی اسے سخت شرمندگی کا سامنا کرنا پڑا۔ پاکستان کی مؤثر جوابی کارروائی نے عالمی سطح پر یہ واضح کر دیا ہے کہ پاکستان ہر سطح پر اپنی خودمختاری کے تحفظ کے لیے پوری طرح تیار ہے۔
"دی ڈپلومیٹ” کے مطابق، پاکستان نے دانشمندانہ سیاسی حکمت عملی اور ذمہ دار رویے سے نہ صرف عالمی برادری کا اعتماد حاصل کیا بلکہ اپنی ساکھ کو مزید مضبوط کیا۔ رپورٹ میں خاص طور پر امریکہ کی جانب سے پاکستانی موقف کی تائید کو بھی نمایاں کیا گیا ہے۔
علاوہ ازیں، پاک چین دفاعی تعاون نے بھارتی ایئرفورس کو بھاری نقصان پہنچایا، جب کہ رافیل طیاروں کی تباہی نے بھارت کو بین الاقوامی سطح پر شرمندگی سے دوچار کر دیا۔
رپورٹ میں مزید انکشاف کیا گیا ہے کہ بھارت، پہلگام حملے میں پاکستان کے خلاف کوئی ٹھوس ثبوت پیش کرنے میں ناکام رہا۔ پاک فوج کی حکمتِ عملی اور عالمی سفارتی حمایت نے بھارتی غرور کو خاک میں ملا دیا۔
