وزیر اعظم شہباز شریف نے چینی کی قیمت میں اضافے کو مسترد کرتے ہوئے کہا کہ شوگر ملیں پورے سال کے لیے 140 روپے ایکس فیکٹری ریٹ یقینی بنائیں۔
وزیر اعظم شہباز شریف کی زیر صدارت خصوصی اجلاس ہوا جس میں چینی کی برآمد سے متعلق امور کا جائزہ لیا گیا۔اجلاس میں وزیراعظم کو بریفنگ دیتے ہوئے بتایا گیا کہ اگر چینی برآمد نہ کی گئی تو اگلے سیزن میں شوگر ملیں دیوالیہ ہو جائیں گی اور 40 شوگر ملیں بند ہو جائیں گی۔شوگر ملز نے رواں سیزن میں گنے کے کاشتکاروں کو 800 ارب روپے میں سے 760 ارب روپے ادا کیے، اس سیزن میں ابھی بھی کسانوں کو 40 ارب روپے ادا کرنے ہیں۔ چینی برآمد نہ کی گئی تو شوگر ملیں نومبر میں کرش نہیں کر سکیں گی۔
وزیراعظم کو بتایا گیا ہے کہ اس وقت ملک میں 15 لاکھ ٹن چینی کا ذخیرہ موجود ہے، اگر 50 لاکھ ٹن چینی برآمد کی جائے تو 26 ملین ڈالر کمائیں گے۔وزیراعظم شہباز شریف نے اس موقع پر کہا کہ چینی کی برآمد کا فیصلہ اقتصادی رابطہ کمیٹی (ای سی سی) کرے گی۔ ای سی سی چینی کے سٹاک اور عالمی مارکیٹ کا جائزہ لے۔ ملک میں چینی کی قیمت میں اضافہ کسی صورت قبول نہیں کیا جائے گا، شوگر ملیں پورے سال کے لیے 140 روپے ایکس فیکٹری قیمت کی فراہمی یقینی بنائیں۔
