راولپنڈی (اخبار خیبر)دھرنے کے شرکا سے اپنے خطاب میں امیرجماعت اسلامی حافظ نعیم الرحمان نے کہا کہ آج تاریخی دھرنے کا 9واں دن ہے، س دھرنا سے لوگوں میں امید پیدا ہوئی ہے ہم اس سے پیچھے نہیں ہٹ سکتے، اپنا حق لےکر یہاں سے اٹھیں گے۔
انہوں نے کہا کہ جماعت اسلامی کا دھرنا عوام کی امیدوں کا ترجمان بن گیا ہے ، دھرنے کے مطالبات خواہشات نہیں حقیقت پر مبنی ہیں، ہم اب دھرنے سے پیچھے نہیں ہٹ سکتے۔
حافظ نعیم الرحمان نے کہا کہ یہ دھرنا پاکستان کی تاریخ میں ایک موڑ ثابت ہوگا ، سیاسی عمل عوام کے مسائل کی بنیاد پر آگے بڑھ رہا ہے ، روزانہ کی بنیاد پر دھرنے میں لوگوں کا اضافہ ہورہا ہے۔
امیر جماعت اسلامی کا کہنا تھا کہ بجلی کے بلوں سے لوگ انتہائی پریشان ہیں، میں جب قطر نماز جنازہ کے لیے روانہ ہوا تو ائیرپورٹ پر ایسے لوگ ملے جنہوں نے موٹر سائیکل بیچ کر بجلی کے بل ادا کیے۔
ان کاکہنا تھا کہ اضافی ٹیکس ، آئی پی پیز ، جن کا تعلق حکومت سے ہے ان کی کیپسٹی پیمنٹ توابھی ختم ہوسکتی ہے ،عوام اضافی ٹیکسز ادا نہیں کریں گے۔
امیر جماعت اسلامی نے کہا کہ غریب، مڈل کلاس اور تاجر سب پریشان ہیں ، چاول ،چینی اور آٹا پر سب ٹیکسز کو ختم کیا جائے۔
حافظ نعیم کا کہنا تھا کہ یہ چاہتے ہیں کہ ذاتیات اورخاندان کی سیاست چلتی رہے، لیکن پاکستان میں نیا کلچر متعارف کرایا جارہا ہے اور ملک میں الیکٹیبلز کی سیاست ختم ہورہی ہے۔
حکومت کے ساتھ مذاکرات بارے بات کرتے ہوئے انہوں نے کہا کہ مذاکرات کے 2ادوار ہوئے۔ حکومت کے پاس ہماری کسی بات کا جواب نہیں، تین دن سے مذاکراتی کمیٹی تلاش گمشدہ کا اشتہار بنی ہوئی ہے، کوئی بات پوشیدہ نہیں ہوگی،تمام مذاکرات عوام کے سامنے ہونگے۔
