سٹیٹ بینک نے مانیٹری پالیسی کا اعلان کرتے ہوئے فیصلہ کیا کہ پالیسی ریٹ کو موجودہ ریٹ 11 اعشاریہ 50 پر ہی برقرار رکھا جائے گا ۔
کراچی: گورنر سٹیٹ بینک جمیل احمد کے مطابق مانیٹری پالیسی کمیٹی نے فیصلہ کیا کہ پالیسی ریٹ کو موجودہ ریٹ 11 اعشاریہ 50 پر ہی برقرار رکھا جائے گا ۔
گورنر سٹیٹ بینک نے بتایا کہ مہنگائی کا پچھلے سالوں میں ٹرینڈ نیچے کی طرف تھا، جولائی سے فروری تک اوسط مہنگائی 5.5 فیصد تھی، مالی سال 2026 میں کرنٹ اکاؤنٹ خسارہ 13 کروڑ 90 لاکھ ڈالر رہا جب کہ مالی سال2027 میں کرنٹ اکاؤنٹ خسارہ جی ڈی پی تناسب سے صفر سے ایک فیصد رہے گا ۔
جمیل احمد کا کہنا تھا دسمبر 2026 تک ترسیلات زر 20.20 ارب ڈالر ہوں گے، عالمی حالات کے باوجود یہ اندازہ برقرار ہے، ایکسپورٹس اور ورکرز ترسیلات ہمارے بڑے ذرائع ہیں، مالی سال27 میں حکومت کی کوششوں سے ایکسپورٹس بہتر ہوں گی، روشن ڈیجیٹل اکاونٹس میں 4 ماہ سے 30 کروڑ ڈالر آرہے ہیں ۔
انہوں نے بتایا کہ رواں مالی سال امپورٹس میں اضافہ ہوگا اور ہمارے انفلوز بھی اچھے رہیں گے، ساری ادائیگیوں کے باوجود ہم نے اپنے زرمبادلہ ذخائر بڑھائے ہیں، مالی سال27 میں 21.5 ارب ڈالر کی بیرونی قرضوں کی ادائیگیاں ہیں ۔
