کوہستان: (تحسین اللہ تاثیر) خیبر پختونخوا کے ضلع اپر کوہستان میں شاہراہ قراقرم پر بس لینڈ سلائیڈنگ کی زد میں آگئی ، واقعے میں 3 مسافر جاں بحق ہوگئے۔ جاں بحق افراد میں 2 فوجی اہلکار اور ایک سویلین شہری شامل ہیں۔
حادثہ اپر کوہستان کے علاقے لوتر تھانہ داسو کی حدود میں پیش آیا،مسافر بس راولپنڈی سے گلگت جار رہی تھی۔
ڈی پی او اپر کوہستان کے مطابق مسافر بس بڑے پتھروں کی زد میں آئی ،واقعے کے نتیجے میں 3 مسافر جاں بحق اور ایک زخمی ہوا۔
ڈی پی او اپر کوہستان مختار احمد کا کہنا ہے کہ جاں بحق افراد کی لاشوں اور زخمی کو ڈسٹرکٹ ہیڈ کوارٹر ہسپتال منتقل کر دیا گیا ہے، 2 جاں بحق ہونے والوں کا تعلق گلگت بلتستان سے ہے جبکہ ایک راولپنڈی کا رہائشی تھا۔
واضح رہے کہ کل رات بارش کے بعد ہونے والی لینڈ سلائیڈنگ کی وجہ سے شاہراہ قراقرم بشام سے ضلع دیامر تک کئی مقامات پر بلاک ہوگئی ہے ۔
