پشاور (حسن علی شاہ) — خیبر ٹیلی ویژن نیٹ ورک نے پشتون فنکاروں اور ہنرمندوں کی خدمات کو اجاگر کرنے کی اپنی روایت کو برقرار رکھتے ہوئے نامور فوک اسٹار استاد احمد گل کی 60 سالہ فنی خدمات کے اعتراف میں خصوصی شو "گل زما دخاورے” کا انعقاد کیا۔
یہ تقریب پشاور اسٹیشن کے مختار بھائی آڈیٹوریم میں منعقد ہوئی، جہاں 91 سالہ استاد احمد گل کو ان کی لازوال خدمات پر خراج تحسین پیش کیا گیا۔ استاد احمد گل گزشتہ چھ دہائیوں سے اپنی منفرد اور سحر انگیز آواز کے ذریعے پشتو موسیقی اور اپنی مادری زبان کی خدمت کر رہے ہیں اور ضعیف العمری کے باوجود فن موسیقی کو زندہ رکھے ہوئے ہیں۔
تقریب کی میزبانی جمشید علی خان (صدارتی ایوارڈ یافتہ)، جی ایم خودمختار ساوی اور مینہ شمس نے کی۔ شو کے دوران استاد احمد گل نے اپنے 60 سالہ فنی سفر کے یادگار لمحات بیان کیے اور صوفیانہ کلام پیش کر کے حاضرین کو محظوظ کیا۔
ان کے صاحبزادے بہادر زیب نے بھی کلاسیکل پشتو ٹپے، رباعیاں اور غزلیں پیش کیں۔ اس موقع پر معروف فنکاروں اور لیجنڈز، جن میں استاد خیال محمد، استاد نذیر گل، گلریز تبسم، گلزار عالم اور بختیار خٹک شامل تھے، نے ویڈیو پیغامات کے ذریعے استاد احمد گل کی خدمات کو سراہا۔
تقریب کے اختتام پر جی ایم خودمختار ساوی اور مینہ شمس کی جانب سے استاد احمد گل کو ایک لاکھ روپے کا امدادی چیک پیش کیا گیا، جس پر انہوں نے کامران حامد راجہ کی فنکار دوستی کو سراہا اور شکریہ ادا کیا۔
