پشاور (شوبز رپورٹر) سینئر فنکار امجد علی خان نے پشاور میں پریس کانفرنس کے دوران کہا کہ سابق وزیراعلیٰ پرویز خٹک کے دور میں فنکاروں کے لیے 50 کروڑ روپے بنوولمنٹ فنڈز کی مد میں جاری کیے گئے تھے، جو اب تک سرد خانے میں پڑے ہیں۔
انہوں نے سوال اٹھایا کہ یہ رقم کہاں گئی اور فنکاروں کے ساتھ یہ ٹوپی ڈرامہ کون کھیل رہا ہے۔ موجودہ وزیراعلیٰ اور سیکرٹری کلچر سے ملاقات کرنے کی کوشش کو "جوئے شیر لانا” قرار دیتے ہوئے امجد علی خان نے کہا کہ کلچر کی ابجد سے ناواقف افراد فنکاروں اور ثقافت کو ہدف بنا کر زیادتی کر رہے ہیں۔
انہوں نے چیف سیکرٹری اور وزیراعلیٰ سے فوری مطالبہ کیا کہ فنکاروں کے منظور شدہ فنڈز کے حوالے سے فوری عملدرآمد کیا جائے۔ اس موقع پر صوبے بھر کے کئی فنکار بھی موجود تھے اور انہوں نے اس صورتحال کی پرزور مزمت کی۔
