ٹی 20 ورلڈ کپ 2024 کے اختتام پر ٹیم آف دی ٹورنامنٹ کا اعلان کردیا گیا ہے۔جبکہ اس اعلان کے مطابق جنوبی افریقہ کا کوئی بھی کھلاڑی شامل نہیں ہے۔
ویسٹ انڈیز اور امریکا کی مشترکہ میزبانی میں کھیلا گیا ٹی ٹوئنٹی ورلڈ کپ 2024 جو کہ بھارت نے اپنے نام کرلیا ہے۔انٹرنیشنل کرکٹ کونسل نے میگا ایونٹ کے اختتام پر ٹیم آف دی ٹورنامنٹ کا اعلان کر دیا ہے جس میں فائنل میچ کو کھیل کر رنر اپ رہنے والی ٹیم جنوبی افریقہ کا کوئی کھلاڑی شامل نہیں ہے۔
آئی سی سی کی طرف سے جس فائنل الیون کا اعلان کیا گیا ہے،اس کے مطابق ٹورنامنٹ کی چیمپئن ٹیم بھارت کے 6،سیمی فائنل تک پہنچنے والی ٹیم افغانستان کے 3 کھلاڑی جبکہ سپر ایٹ مرحلہ کھیلنے والی میزبان ویسٹ انڈیز اور اس کے ساتھ ہی آسٹریلیا کا ایک ایک کھلاڑی شامل کیا گیا ہے۔
انٹرنیشنل کرکٹ کونسل کی جانب سے ٹیم آف دی ٹورنامنٹ کی قیادت کا تاج اس میگا ایونٹ میں بھارت کی کپتانی کرنے والے روہت شرما کو دیا گیا ہے۔
ٹیم میں بھارت کے سوریا کمار یادیو، ہاردک پانڈیا، اکشر پٹیل، جسپریت بمرا اور ارشدیپ سنگھ کو بھی شامل کیا گیا ہے۔ٹی 20 ورلڈ کپ 2024 کے ٹاپ اسکورر اور افغانستان کے اوپنر رحمان اللہ گرباز، فضل حق فاروقی اور افغان کپتان راشد خان بھی اس ٹیم کا حصہ ہیں۔
ویسٹ انڈیز کے نکولس پوران اور آسٹریلیا کے مارکوس اسٹوئنس بھی اس ٹیم آف دی ٹورنامنٹ الیون میں شامل ہیں جبکہ اس کے برعکس جنوبی افریقہ کے بولر اینرخ نورکیا کو ٹیم کا بارھواں کھلاڑی رکھا گیا ہے۔اس کے برعکس سیمی فائنل کھیلنے والی ٹیم انگلینڈ کا بھی کوئی کھلاڑی شامل نہیں کیا گیا ہے جبکہ اس کے ساتھ ہی پاکستان، نیوزی لینڈ اور سری لنکا سے بھی کوئی جگہ نہیں بنا سکا ہے۔
