فیفا ورلڈ کپ 2026 کا فائنل آج 19 جولائی کو امریکا کی ریاست نیو جرسی میں اسپین اور ارجنٹینا کے درمیان کھیلا جائے گا، جہاں شائقین کو سنسنی خیز فٹبال مقابلے کے ساتھ عالمی شہرت یافتہ فنکاروں کی شاندار پرفارمنس بھی دیکھنے کو ملے گی۔
میچ کے آغاز سے قبل امریکی گلوکارہ جینیفر ہڈسن امریکا کا قومی ترانہ پیش کریں گی، جبکہ افتتاحی تقریب کے بعد ہاف ٹائم شو میچ کے پہلے اور دوسرے ہاف کے درمیان منعقد ہوگا۔
ہاف ٹائم شو کی خاص کشش عالمی شہرت یافتہ پاپ اسٹار جسٹن بیبر ہوں گے، جو میڈونا، شکیرا اور بی ٹی ایس کے ساتھ اس بار کے مرکزی فنکاروں میں شامل ہیں۔
ورلڈ کپ کی اختتامی تقریب میں اطالوی گلوکارہ لورا پاؤزینی، امریکی گلوکارہ نیکول شیرزنگر، برطانوی پاپ اسٹار رابی ولیمز اور معروف یوٹیوبر آئی شو اسپیڈ بھی اپنی فنکارانہ صلاحیتوں کا مظاہرہ کریں گے، جبکہ ہالی ووڈ اداکار ٹام کروز بھی خصوصی شرکت کریں گے۔
فٹبال کے سب سے بڑے مقابلے کے ساتھ موسیقی اور تفریح کا یہ منفرد امتزاج ورلڈ کپ فائنل کو دنیا بھر کے شائقین کے لیے یادگار بنانے کے لیے تیار ہے۔
