لاہور: پاکستان کرکٹ بورڈ نے بنگلادیش کے خلاف تین میچوں پر مشتمل ٹی 20 سیریز کے لیے 16 رکنی قومی سکواڈ کا اعلان کر دیا، سکواڈ میں بابراعظم، محمد رضوان اور شاہین شاہ آفریدی کو پھر ڈراقپ کیا گیا ہے ۔
پی سی بی کی نئی سلیکشن کمیٹی کے مطابق آل راؤنڈر سلمان علی آغا کو ٹیم کا کپتان مقرر کیا گیا ہے جبکہ شاداب خان نائب کپتان کی حیثیت سے سکواڈ کا حصہ ہوں گے ۔
سلیکشن کمیٹی کا کہنا ہے کہ ٹیم میں نوجوان اور تجربہ کار کھلاڑیوں کا امتزاج رکھا گیا ہے تاکہ کارکردگی اور مستقبل کی تیاری میں توازن قائم رکھا جا سکے ۔
سلیکشن کمیٹی کے مطابق قومی سکواڈ میں سلمان علی آغا (کپتان)، شاداب خان (نائب کپتان)، ابرار احمد، فہیم اشرف، فخر زمان، حارث رؤف، حسن علی، حسن نواز، حسین طلعت، محمد عرفان خان نیازی، خوشدل شاہ، محمد حارث (وکٹ کیپر)، محمد وسیم جونیئر، نسیم شاہ، صاحبزادہ فرحان (وکٹ کیپر) اور صائم ایوب شامل ہیں ۔
پی سی بی کے مطابق اس سکواڈ میں کئی باصلاحیت نوجوان کھلاڑی شامل کیے گئے ہیں جنہیں اپنی صلاحیتوں کے اظہار کا بہترین موقع ملے گا، یہ سلیکشن آئندہ بین الاقوامی ایونٹس کی تیاری کے سلسلے کی کڑی ہے ۔
یاد رہے کہ سیریز کی میزبانی پاکستان کرے گا اور قذافی سٹیڈیم لاہور تینوں میچز کی میزبانی کرے گا، سیریز کے مکمل شیڈول اور دیگر تفصیلات کا اعلان جلد متوقع ہے ۔
