پشاور میں باچہ خان ایئر پورٹ پر مشترکہ کارروائی کے دوران کروڑوں روپے مالیت کے سونے کی بیرون ملک سمگل کرنے کی کوشش ناکام بنا دی گئی، ایف آئی اے کے مطابق سمگلنگ میں ملوث قومی ایئر لائن کے دو اہلکاروں کو گرفتار کرلیا گیا ہے ۔
پشاور: ایف آئی اے کمرشل بینکنگ سرکل پشاور اور اے ایس ایف نے مشترکہ کاروائی کرتے ہوئے کروڑوں روپے مالیت کے سونے کی بیرون ملک سمگلنگ ناکام بناتے ہوئے پی آئی اے کے 2 اہلکاروں کو گرفتار کرلیا ۔
ترجمان ایف آئی اے کے مطابق گرفتار ملزمان میں پی آئی اے کے ناصر خان اور شاہد اللہ شامل ہیں ،دونوں ملزمان کو باچا خان انٹرنیشنل ائیرپورٹ پشاور سے گرفتار کیا گیا ۔
ترجمان کے مطابق گرفتار ملزمان کے قبضے سے 7740 گرام( 645 تولے ) سونا برآمد کر لیا گیا،گرفتار ملزمان پشاور ائیرپورٹ پر تعینات تھے ۔
ایف آئی اے کا مزید کہنا تھا کہ گرفتار ملزمان کا 2 روزہ جسمانی ریمانڈ حاصل کر لیا گیا، ملزمان سے مزید تفتیش اور دیگر ملزمان کی گرفتاری کے لئے کارروائیاں جاری ہیں ۔
