پشاور (شوبز ڈیسک): خالدہ یاسمین کا شمار خیبر پختونخوا کی اُن ہمہ جہت فنکاراؤں میں ہوتا ہے جنہوں نے ٹی وی، ریڈیو اور اسٹیج تینوں میدانوں میں اپنی فنی صلاحیتوں کا لوہا منوایا۔ بطور اینکر، اداکارہ اور صداکارہ تین دہائیوں سے فنی خدمات انجام دینے والی خالدہ یاسمین نے حال ہی میں خیبر ٹیلی ویژن کے شو “لالی وڈ، بالی وڈ” میں میزبان رابعہ خان سے خصوصی گفتگو کی۔
گفتگو کے دوران خالدہ یاسمین نے انکشاف کیا کہ معروف فنکارہ یاسمین جعفری مرحومہ (غٹہ بے بے) ان کی آئیڈیل تھیں اور وہ انہی سے متاثر ہو کر شوبز کی دنیا میں آئیں۔ انہوں نے بتایا کہ بچپن میں ٹی وی پر اداکاروں کو دیکھ دیکھ کر ان کے دل میں اداکاری کا شوق پیدا ہوا۔
خالدہ یاسمین نے پشتو فلم انڈسٹری میں اپنی منفرد خدمات کا ذکر کرتے ہوئے کہا کہ انہوں نے تقریباً ہر عمر کی خاتون اداکارہ کی آواز میں ڈبنگ کی ہے، اور یہ اعزاز انہیں حاصل ہے کہ وہ ہر کردار کے مطابق آواز ڈھالنے کی صلاحیت رکھتی ہیں۔
انہوں نے اپنے فنی سفر کا آغاز پشاور ٹیلی ویژن سے کیا اور متعدد سینئر پروڈیوسرز اور نامور اداکاروں کے ساتھ مختلف اور چیلنجنگ کردار ادا کیے۔ خالدہ یاسمین نے مرحوم شینو ماما کے ساتھ اپنے کام کو یاد کرتے ہوئے کہا کہ کامیڈی میں ان کی اداکاری کی وہ بے حد معترف ہیں۔
ان کا کہنا تھا کہ شینو ماما جیسے فنکار ہمارے لیے ایک مکمل اکیڈمی کی حیثیت رکھتے ہیں۔ وہ نہ صرف ایک بہترین اداکار تھے بلکہ ایک ملنسار اور شفیق انسان بھی تھے۔ خالدہ یاسمین نے خیبر ٹیلی ویژن کے معروف میوزک شو “ٹنگ ٹکور” میں شینو ماما کے ساتھ بطور اینکر کام کیا، جسے وہ اپنے کیریئر کی ایک یادگار پیش رفت قرار دیتی ہیں۔
