انڈر 19 ورلڈ کپ کے پہلے سیمی فائنل میں انگلینڈ نے آسٹریلیا کو 27 رنز سے شکست دے کر فائنل کے لیے کوالیفائی کر لیا۔ انگلینڈ کے 278 رنز ہدف کے تعاقب میں آسٹریلیا کی پوری ٹیم 48ویں اوور میں 250 رنز پر ڈھیر ہو گئی اور فائنل سے باہر ہو گئی ۔
زمبابوے کے شہر بلاوایو میں کھیلے گئے انڈر 19 ورلڈ کپ کے پہلے سیمی فائنل میں انگلینڈ نے ٹاس جیت کر پہلے بیٹنگ کا فیصلہ کیا ۔
انگلینڈ کی ٹیم نے مقررہ اوورز میں سات وکٹوں کے نقصان پر 277 رنز بنائے تھے جس میں تھامس ریو نے شاندار 110 اور کالیب فورکنر نے 40 رنز بنائے ۔
آسٹریلیا کی جانب سے ہیڈن چلر اور نیڈ کورے نے دو دو وکٹیں حاصل کیں ۔
ہدف کے تعاقب میں آسٹریلیا کی پوری ٹیم 48 اوورز میں 250 رنز پر ڈھیر ہوگئی اور فائنل میچ سے باہر ہوگئی ۔
آسٹریلیا کے کپتان اولیور پیک نے آخری لمحات تک انگلش بولرز کا مقابلہ کیا اور 100 رنز بنا کر آؤٹ ہوئے، نتیش سیموئل 47 اور آرین شرما 34 رنز بنا کر آؤٹ ہوئے ۔
انگلینڈ کی جانب سے سبسٹین مورگن، جیمز منٹو، مینی لمسڈن اور رالف البرٹ نے دو دو وکٹیں حاصل کیں ۔
انگلینڈ کے تھامس ریو کو شاندار 110 رنز بنانے پر مین آف دی میچ کا ایوارڈ دیا گیا، ایونٹ کا دوسرا سیمی فائنل کل ہرارے میں افغانستان اور بھارت کے درمیان کھیلا جائے گا ۔
