پشاور (خصوصی رپورٹر) — امریکہ، ایران اور اسرائیل کے درمیان جاری کشیدگی اور خطے کی بدلتی ہوئی صورتحال پر خیبر ٹیلی ویژن نیٹ ورک کے چینلز خیبر نیوز، کے ٹو اور خیبر انٹرٹینمنٹ مسلسل مستند اور بروقت کوریج فراہم کر رہے ہیں۔
نیٹ ورک کے مختلف ٹاک شوز میں اسلام آباد اور پشاور سے بیک وقت نشریات پیش کی جا رہی ہیں، جن میں پاکستان کے بطور ثالث کردار اور اس کی مؤثر سفارتکاری کو نمایاں طور پر اجاگر کیا جا رہا ہے۔
پشاور سے محمد وسیم کا پروگرام “کراس ٹاک”، کے ٹو سے ملک محمد حسنین اور رفعت اللہ اورکزئی کے پروگرامز جبکہ اسلام آباد سے مبارک علی کا “معرکہ”، فیاض یوسفزئی کا “دہ دے وخت خبرے” اور سیف اللہ و انتخاب عالم کے شوز میں خطے کی تازہ صورتحال پر تفصیلی گفتگو کی جا رہی ہے۔
ان پروگرامز میں نہ صرف امریکہ ایران کشیدگی بلکہ افغانستان سے دراندازی اور بھارتی سازشوں جیسے اہم موضوعات پر بھی ناظرین کو آگاہ کیا جا رہا ہے۔ ٹاک شوز میں سینئر صحافیوں، معروف تجزیہ نگاروں اور سیاسی شخصیات کو مدعو کر کے مختلف پہلوؤں پر ان کی آراء بھی شامل کی جا رہی ہیں۔
مبصرین کے مطابق خیبر ٹیلی ویژن نیٹ ورک ایک قومی چینل کے طور پر اپنی ذمہ داریاں احسن انداز میں ادا کر رہا ہے اور موجودہ حساس حالات میں عوام کو بروقت اور مستند معلومات فراہم کر رہا ہے۔
