جمعیت علماء اسلام کے امیر مولانا فضل الرحمان نے معروف عالم دین مولانا محمد ادریس کے قاتلوں کی گرفتاری کا مطالبہ کرتے ہوئے جمعہ کو ملک بھر میں مظاہروں کا اعلان کردیا ۔
چارسدہ: امیر جے آئی مولانا فضل الرحمان علاقہ ترنگزئی پہنچے جہاں انہوں نے مولانا محمد ادریس کے گھر جا کر تعزیت کی اور مولانا محمد ادریس کو خراج عقیدت پیش کیا ۔
اس موقع پر میڈیا سے گفتگو کرتے ہوئے مولانا فضل الرحمان نے کہا کہ اختلاف رائے پرکسی مسلمان کا قتل جہالت ہے، مولانا ادریس کی جدائی امت مسلمہ کے لیے صدمہ ہے، اللہ اپنی قدرت سے ظالموں سے مولانا ادریس کا انتقام لےگا، وہ امن کی تلاش میں بے امنی کا شکار ہوگئے ۔
انہوں نے کہا کہ علماء کرام پاکستان کے آئین کے ساتھ کھڑے ہیں، ہمارا متفقہ فیصلہ ہےکہ پاکستان کے اندر اسلحہ اٹھانا جائز نہیں، ہمارا حکمرانوں اور اداروں سے مطالبہ ہے مفت کی تنخواہیں نہ لیں،اداروں کا فرض ہے کہ مولانا ادریس کے قاتلوں کو گرفتار کریں ۔
مولانا فضل الرحمان کا مزید کہنا تھا کہ 14 مئی کو کراچی میں ایک بڑے جلسے میں آئندہ کے لائحہ عمل کا اعلان کیا جائے گا ۔
