پشاور (نیوز ڈیسک): شعبہ جرنلزم اینڈ ماس کمیونیکیشن کے اسسٹنٹ پروفیسر ڈاکٹر بخت زمان یوسفزئی نے کہا ہے کہ عصرِ حاضر میں صحافت تیزی سے کمرشل ازم کی طرف بڑھ رہی ہے اور جدید میڈیا کے تقاضوں کو نظر انداز کر کے اداروں کا قائم رہنا ممکن نہیں رہا۔
انہوں نے کہا کہ جرنلزم اور کمرشل ازم ایک دوسرے سے گہرے طور پر جڑے ہوئے ہیں، اور جب تک اخبارات، ٹیلی ویژن چینلز اور یوٹیوب پلیٹ فارمز اپنی مواد سازی میں مارکیٹنگ کے اصولوں کو مدنظر نہیں رکھیں گے، اس وقت تک ان اداروں کی بقا ممکن نہیں ہوگی۔
ڈاکٹر بخت زمان یوسفزئی کے مطابق میڈیا اداروں کے لیے آمدن اور مالی استحکام بنیادی ضرورت بن چکی ہے، جس کے بغیر ملازمین کی تنخواہیں، یوٹیلیٹی بلز، ٹرانسپورٹ، بونس اور پروموشنز جیسے معاملات غیر یقینی رہتے ہیں۔
انہوں نے مزید کہا کہ موجودہ دور میں صحافت اور مارکیٹنگ ایک دوسرے پر انحصار کرتے ہیں، اور اس حقیقت کو تسلیم کیے بغیر میڈیا انڈسٹری کے چیلنجز سے نمٹنا ممکن نہیں۔
