پشاور (خصوصی رپورٹر): فلاحی تنظیم HOPE کے بانی اور معروف سماجی کارکن زبیر الہی نے پشاور پریس کلب میں صحافیوں میں حفاظتی جیکٹس تقسیم کرنے کا اپنا وعدہ پورا کر دیا۔
پریس کلب میں منعقدہ تقریب کے دوران صحافیوں کو حفاظتی جیکٹس فراہم کی گئیں۔ اس موقع پر خطاب کرتے ہوئے زبیر الہی نے کہا کہ صحافی اپنی جان خطرے میں ڈال کر ہر قسم کی کوریج کرتے ہیں، اس لیے ان کا تحفظ صرف حکومت کی ذمہ داری نہیں بلکہ مخیر حضرات اور سماجی تنظیموں کو بھی آگے آنا چاہیے۔
انہوں نے کہا کہ HOPE معاشرے کے ہر محروم، غریب اور ضرورت مند فرد کی مدد کو اپنا دینی اور اخلاقی فرض سمجھتی ہے اور آئندہ بھی فلاحی سرگرمیوں کا سلسلہ جاری رہے گا۔
تقریب سے خطاب کرتے ہوئے سینئر صحافی اور پریس کلب کے چیئرمین ایم ریاض نے زبیر الہی کی کاوشوں کو سراہتے ہوئے کہا کہ صحافیوں کے تحفظ کے لیے ان کا اقدام ایک قابلِ تقلید مثال ہے۔ انہوں نے کہا کہ اس طرح کے اقدامات میڈیا ورکرز کی حوصلہ افزائی اور ان کے تحفظ کے لیے اہم کردار ادا کرتے ہیں۔
