پشاور (خصوصی رپورٹر): چیف خطیب پشاور مولانا طیب قریشی نے کہا ہے کہ ایران اور امریکہ کے درمیان امن معاہدے پر رضامندی پاکستان کی مسلسل اور مؤثر سفارتی کوششوں کا نتیجہ ہے، جس سے خطے میں ایک بڑی عالمی جنگ کا خطرہ ٹل گیا ہے۔
اخبار خیبر سے خصوصی گفتگو کرتے ہوئے مولانا طیب قریشی نے کہا کہ پاکستان نے ہمیشہ خطے میں امن، استحکام اور مکالمے کے فروغ کے لیے مثبت کردار ادا کیا ہے۔ ان کے مطابق حالیہ پیش رفت پاکستان کی سفارتی حکمت عملی کی کامیابی اور عالمی سطح پر اس کے بڑھتے ہوئے کردار کا واضح ثبوت ہے۔
انہوں نے کہا کہ اس عمل میں فیلڈ مارشل سید عاصم منیر کا کردار بھی قابلِ ذکر ہے، جنہوں نے نہ صرف ایران اور امریکہ بلکہ مشرقِ وسطیٰ کے مختلف ممالک کے اعتماد کو مضبوط کیا۔ ان کے مطابق یہ اعتماد اس بات کا مظہر ہے کہ پاکستان ایک امن پسند اسلامی ریاست کے طور پر اپنی شناخت منوا رہا ہے۔
مولانا طیب قریشی نے مزید کہا کہ خطے میں کشیدگی میں کمی اور مذاکرات کی طرف پیش رفت پاکستان کی خارجہ پالیسی کی کامیابی ہے، جو عالمی امن کے لیے ایک مثبت قدم ثابت ہوگی۔
