پشاور(حسن علی شاہ) : پشاور میں غیر قانونی طور پر مقیم افغان باشندوں کے خلاف قانون نافذ کرنے والے اداروں نے کریک ڈاؤن کا آغاز کر دیا ہے۔ کارروائی کے دوران شہر کے مختلف علاقوں سے متعدد افراد کو حراست میں لیا گیا۔
ذرائع کے مطابق بورڈ بازار، تاج آباد، کینال ٹاؤن، اچینی پایان، سربند، سفید ڈھیری، دانش آباد اور حیات آباد سمیت مختلف علاقوں میں کارروائیاں کی گئیں، جہاں غیر قانونی طور پر مقیم افغان باشندوں کی شناخت کے بعد گرفتاریاں عمل میں لائی گئیں۔
اطلاعات کے مطابق حکام نے 10 جولائی تک غیر قانونی طور پر مقیم افراد کے لیے مقررہ ڈیڈ لائن دی ہے۔ اس کے بعد شہر بھر میں گھر گھر سرچ اور کلیئرنس آپریشن کیے جانے کا امکان ہے تاکہ غیر قانونی طور پر مقیم غیر ملکی شہریوں کے خلاف کارروائی مکمل کی جا سکے۔
حکام کی جانب سے شہریوں کو ہدایت کی گئی ہے کہ وہ اپنے کرایہ داروں اور رہائشی افراد کے قانونی دستاویزات کی تصدیق یقینی بنائیں اور قانون نافذ کرنے والے اداروں کے ساتھ مکمل تعاون کریں۔
