ضلع بونیر کے علاقے طوطالئی کے مداخیل میں نامعلوم دہشت گردوں کی فائرنگ کے نتیجے میں محکمہ انسدادِ دہشت گردی (سی ٹی ڈی) کے سب انسپکٹر (ایس آئی) مسکین زادہ خان شہید ہوگئے۔ پولیس ذرائع کے مطابق شہید افسر سادہ کپڑوں میں ڈیوٹی انجام دے رہے تھے کہ اس دوران نامعلوم مسلح افراد نے ان پر اچانک فائرنگ کر دی، جس کے نتیجے میں وہ موقع پر ہی جان کی بازی ہار گئے۔
واقعے کے فوراً بعد طوطالئی پولیس نے علاقے کے داخلی اور خارجی راستوں پر ناکہ بندی کر دی، جبکہ حملہ آوروں کی گرفتاری کے لیے مختلف مقامات پر سرچ آپریشن بھی شروع کر دیا گیا ہے۔ پولیس حکام کا کہنا ہے کہ ملزمان کی تلاش جاری ہے اور واقعے کی تمام پہلوؤں سے تحقیقات کی جا رہی ہیں۔
فائرنگ کے واقعے کے بعد خدوخیل اور گردونواح کے علاقوں میں خوف و ہراس پھیل گیا۔ مقامی افراد بڑی تعداد میں گھروں سے باہر نکل آئے، جبکہ بعض شہری اپنی حفاظت کے پیشِ نظر اسلحہ لے کر سڑکوں پر آ گئے۔ علاقے میں سیکیورٹی مزید سخت کر دی گئی ہے تاکہ کسی بھی ناخوشگوار صورتحال سے نمٹا جا سکے۔
دوسری جانب شہید ایس آئی مسکین زادہ خان کی شہادت کی خبر پھیلتے ہی اہلِ علاقہ کی بڑی تعداد ان کی رہائش گاہ پر پہنچ گئی، جہاں سوگ کا ماحول ہے۔ پولیس حکام نے شہید افسر کی خدمات کو خراجِ عقیدت پیش کرتے ہوئے کہا ہے کہ حملے میں ملوث عناصر کو جلد قانون کے کٹہرے میں لایا جائے گا۔
