پاک فوج، ایف سی اور پولیس کی جانب سے بلوچستان میں مشترکہ ’آپریشن شعبان‘ جاری ہے، ذرائع کے مطابق تازہ کارروائی میں مزید 4 دہشتگرد اپنے انجام کو پہنچا دیئے گئے ، جس کے بعد اب تک ہلاک دہشتگردوں کی مجموعی تعداد 109 تک پہنچ گئی ۔
سیکیورٹی فورسز کی فتنہ الخوارج کےخلاف بلوچستان کے مختلف علاقوں میں موثر کارروائیاں جاری ہیں، آپریشن شعبان اور دیگر کارروائیوں میں 5 جولائی سے اب تک ہلاک دہشتگردوں کی مجموعی تعداد 109 ہوگئی ۔
سیکیورٹی ذرائع کا کہنا ہے کہ خارجیوں کو فضائی اور زمینی کارروائیوں میں نشانہ بنایا جا رہا ہے، ہلاک خارجیوں کے قبضے سے بڑی تعداد میں اسلحہ اور گولہ بارود بھی برآمد کیا گیا، برآمد اسلحے میں ایم 4 رائفل، ایس ایم جیز، راکٹ لانچر، موبائل فونز اور دیگر سامان شامل ہیں ۔
سیکیورٹی ذرائع کا کہنا ہے کہ آخری دہشتگرد کے خاتمے تک بلوچستان میں آپریشن شعبان جاری رہے گا، دوسری جانب وزیر داخلہ محسن نقوی نے کہا ہے کہ سیکیورٹی اداروں کی مشترکہ کارروائیاں قومی سلامتی کے تحفظ کے عزم کی عکاس ہیں۔ افسران اور جوانوں کی بہادری اور پیشہ ورانہ صلاحیتوں کو خراجِ تحسین پیش کرتے ہیں ۔
