اسلام آباد: ایران نے پاکستان کے ساتھ دوطرفہ تجارت اور اقتصادی تعاون کو مزید فروغ دینے کے لیے کراچی اور گوادر بندرگاہوں کے ذریعے تجارتی سرگرمیوں میں اضافے میں دلچسپی کا اظہار کیا ہے ۔
اس حوالے سے اظہار خیال ایران کے وزیر صنعت، کان کنی و تجارت محمد اتابک نے پاکستان۔ایران مشترکہ تجارتی کمیٹی کے دسویں اجلاس کی مشترکہ صدارت کرتے ہوئے کیا ۔ اجلاس میں وفاقی وزیر تجارت جام کمال خان بھی شریک تھے ۔
محمد اتابک نے کہا کہ ایران پاکستان کے ساتھ جامع اور مضبوط اقتصادی تعلقات کے فروغ کو خصوصی اہمیت دیتا ہے ۔ انہوں نے کہا کہ دونوں ممالک کے درمیان آزاد تجارتی معاہدے پر مذاکرات مثبت انداز میں آگے بڑھ رہے ہیں اور امید ہے کہ یہ مذاکرات جلد کامیابی سے مکمل ہو جائیں گے ۔
وفاقی وزیر تجارت جام کمال خان نے کہا کہ مشترکہ سرحدی منڈیوں کو فعال بنانا مقامی آبادی کے روزگار اور معاشی سرگرمیوں کے فروغ کے لیے انتہائی اہم ہے ۔
انہوں نے کہا کہ پاکستان اور ایران کا نجی شعبہ ایک دوسرے پر اعتماد رکھتا ہے اور تجارت کے فروغ کے لیے تیار ہے۔ دونوں ممالک کے تاجروں کو آسان، منظم اور قابلِ اعتماد تجارتی ماحول فراہم کرنا حکومتوں کی اہم ذمہ داری ہے ۔
جام کمال خان نے اس بات پر زور دیا کہ پاکستان اور ایران کے درمیان اقتصادی شراکت داری کو مزید وسعت دینے کے لیے عملی اقدامات پر مشتمل لائحہ عمل تیار کرنا ضروری ہے ، تاکہ باہمی تجارت اور تعاون کو نئی بلندیوں تک لے جایا جا سکے ۔
