محسن انسانیت، وجہ تخلیق کائنات نبی آخر الزماں حضرت محمد مصطفیٰﷺ کی یوم ولادت باسعادت کا جشن، ملک بھر میں عید میلاد النبی ﷺ مذہبی جوش و جذبے، عقیدت و احترام کے ساتھ منائی جا رہی ہے، ہر سو سبز جھنڈیوں، برقی قمقموں اور درود و سلام کی صداؤں نے سماں باندھ دیا ہے ۔
یوم ولادت رسولﷺ کے موقع پر دن کا آغاز توپوں کی سلامی سے ہوا، وفاقی دارالحکومت میں 31، جبکہ صوبائی دارالحکومتوں میں 21، 21 توپوں کی سلامی دی گئی، اس موقع پر فوجی جوانوں کی جانب سے نعرہ تکبیر بھی بلند کیا گیا ۔
مساجد میں نماز فجر کے بعد ملک کی سلامتی، ترقی اور امت مسلمہ کے اتحاد کے لئے خصوصی دعائیں کی گئی، فضا درود وسلام کی خوشبوں سے معطر ہوگئی ۔
جشن میلاد النبیﷺ کے سلسلے میں ملک کے مختلف شہروں کی گلیاں، محلے، بازار اور شاہراہیں خوبصورت روشنیوں، برقی قمقموں اور سبز جھنڈیوں سے سجا دی گئی ہیں، جبکہ سرکاری و نجی عمارتوں پر بھی چراغاں کیا گیا ہے، کئی مقامات پر محرابیں اور آرائشی دروازے بھی نصب کئے گئے ہیں۔
دوسری جانب آج عید میلاد النبیﷺ کی مناسبت سے ملک بھر میں خصوصی تقریبات، محافل اور ریلیوں کا اہتمام کیا جا رہا ہے ۔
صدر آصف علی زرداری اور وزیراعظم محمد شہبازشریف نے جشن عید میلاد النبیﷺ پر قوم کو مبارکباد دی، وطن میں امن، استحکام اور خوشحالی کیلئے دعائیں مانگیں ۔
صدر آصف علی زرداری نے اپنے پیغام میں کہا بحیثیت امت محمدیﷺ ہم پر لازم ہے کہ اپنے معاشرے میں عدل و انصاف، برداشت، بین المسالک و بین المذاہب ہم آہنگی اور انسانی وقار کے تحفظ کا عملی مظاہرہ کریں ۔
آصف علی زرداری نے کہا کہ نوجوان نسل کو سیرتِ طیبہ سے رہنمائی حاصل کرتے ہوئے علم، بلند کردار، محنت اور خدمت انسانیت کو اپنی زندگی کا مقصد بنانا چاہئے ۔
وزیراعظم محمد شہباز شریف نے کہا اسوہ حسنہﷺ تمام مسلمانوں کی دینی و دنیاوی اصلاح و فلاح اور مثالی کامیابی کیلئے مشعل راہ ہے، رسول اللہﷺ کی ذات مبارک دین اسلام کی تعلیمات کا بہترین نمونہ ہے ۔
محمد شہبازشریف نے کہا کہ آئیں عہد کریں کہ ہم سیرت طیبہ کو اپنے کردار، انفرادی رویوں اور اجتماعی طرز عمل میں اختیار کرنے کی کوشش کریں گے اور پاکستان کو ایک مضبوط، خوشحال، پر امن اور فلاحی ریاست بنانے کیلئے اپنا کردار ادا کریں گے ۔
