بنوں میں دہشت گردوں نے پولیس چوکی فتح خیل پر بارود سے بھری گاڑی ٹکرا دی، پولیس حکام کے مطابق خودکش دھماکے کے نتیجے میں شہید پولیس اہلکاروں کی تعداد 15 ہوگئی،پولیس کے مطابق تین اہلکاروں کو ملبے سے زندہ نکال لیا گیا ۔
بنوں: ڈی آئی جی بنوں ریجن سجاد خان نے رات گئے متاثرہ چوکی کا دورہ کیا ، ان کا کہنا تھا کہ دہشتگردوں نے چوکی کیساتھ بارود سے بھری گاڑی ٹھکرائی اور پھر چوکی کا گھیراؤ کیا ۔
ان کا کہنا تھا کہ خودکش دھماکے میں 15 پولیس اہلاکر شہید اور 3 شدیدی زخمی ہوئے ہیں ،شہداء میں رحمت ایاز، ثناء اللہ، نیاز علی، صحیب، سعداللہ، کامران ولد محمود خان، نعمت اللہ، کامران، عابد جانی، عمران، نعیم اللہ، صدیق اللہ، میر عالم خان، راحت اللہ خان اور فاروق داد شامل ہیں ۔
ڈی آئی جی بنوں ریجن سجاد خان نے رات گئے ڈی ایچ کیو ہسپتال کا بھی دورہ کرتے ہوئے زخمی اہلکاروں کی عیادت کی، ہسپتال میں میڈیا سے گفتگو کرتے ہوئے ڈی آئی جی بنوں ریجن نے کہا کہ بنوں پولیس کے حوصلے بلند ہیں، دہشت گرد اپنے ناپاک عزائم میں کبھی کامیاب نہیں ہوں گے ۔
ڈی آئی جی بنوں کا کہنا تھا کہ یہ دہشت گردوں کی آخری بزدلانہ کارروائی ثابت ہوگی، بنوں پولیس دہشت گردوں کو چن چن کر انجام تک پہنچائے گی اور علاقے سے ان کا مکمل خاتمہ یقینی بنایا جائے گا ۔
دوسری جانب وزیراعلیٰ خیبر پختونخوا محمد سہیل آفریدی نے ضلع بنوں میں فتح خیل پولیس اسٹیشن پر دہشت گرد حملے کی شدید مذمت کرتے ہوئے جانی نقصان پر گہرے دکھ اور افسوس کا اظہار کیا ۔
سہیل آفریدی نے زخمیوں کو بہترین طبی سہولیات کی فراہمی یقینی بنانے کی ہدایت کرتے ہوئے شہداء کے درجات کی بلندی اور زخمیوں کی جلد صحتیابی کے لیے دعا کی ۔
