وفاقی وزیر داخلہ محسن نقوی نے غیر قانونی امیگریشن اور انسانی اسمگلنگ میں ملوث مافیا کے خلاف بلا امتیاز سخت کارروائی جاری رکھنے کے واضح احکامات جاری کر دیے ہیں۔
محسن نقوی کی زیرِ صدارت ایک اہم اجلاس منعقد ہوا جس میں وفاقی سیکرٹری داخلہ، ایڈیشنل سیکرٹری داخلہ، ڈائریکٹر جنرل ایف آئی اے اور ایف آئی اے کے کراچی و لاہور زونز کے ڈائریکٹرز نے شرکت کی۔
اجلاس میں ایف آئی اے کے امیگریشن ونگ کی مجموعی کارکردگی کا جائزہ لیا گیا اور غیر قانونی امیگریشن و انسانی اسمگلنگ کی روک تھام کے لیے جاری اقدامات پر تفصیلی بریفنگ دی گئی۔ اس کے علاوہ پیشہ ور بھکاری مافیا کے خلاف جاری کارروائیوں پر بھی غور کیا گیا۔
اس موقع پر وزیر داخلہ محسن نقوی نے ہدایت کی کہ انسانی اسمگلنگ میں ملوث عناصر کسی قسم کی رعایت کے مستحق نہیں۔ انہوں نے کہا کہ ائیرپورٹس پر امیگریشن چیکنگ کے نظام کو مزید مؤثر بنایا جائے اور مسافروں کی سفری دستاویزات کی سخت اسکریننگ کو یقینی بنایا جائے۔
وفاقی وزیر داخلہ نے واضح کیا کہ پاکستان کے وقار اور ساکھ پر کسی صورت آنچ نہیں آنے دی جائے گی اور اس حوالے سے تمام ادارے اپنی ذمہ داریاں پوری کریں۔
