بنوں واقعہ: جرگے نے وزیراعلیٰ کے پی کو مطالبات پیش کردیے، دھرنا جاری رکھنے کا اعلان. وزیراعلیٰ خیبرپختونخوا علی امین گنڈاپور نے بنوں واقعہ سے متعلق تشکیل کردہ جرگے کے مطالبات ایپکس کمیٹی کے سامنے رکھنے کا فیصلہ کرلیا، جرگے کے ارکان نے ایپکس کمیٹی کا فیصلہ آنے تک دھرنا جاری رکھنے کا اعلان کردیا۔
بنوں واقعہ سے متعلق تشکیل کردہ جرگہ ارکان نے وزیراعلیٰ علی امین گنڈاپور سے ملاقات کرکے اپنے مطالبات پیش کیے۔ وزیر اعلیٰ ہاؤس پشاور میں ہونی والی اس ملاقات کے دوران پیش کیے گئے مطالبات میں آپریشن عزم استحکام کی مخالفت اور مسلح گروپوں کا خاتمہ شامل تھا۔
جرگہ ارکان کی جانب سے پیش کیے گئے مطالبات میں پولیس کو با اختیار بنانے اور رات کو گشت کرنے کا مطالبہ بھی شامل ہیں جبکہ سرچ آپریشن یا دہشتگردوں کے خلاف کارروائی سکیورٹی فورسز کے بجائے سی ٹی ڈی کو کرنے کا مطالبہ بھی کیا گیا۔ جرگہ ارکان کی جانب سے لاپتا افراد کو عدالتوں کے سامنے پیش کرنے کا بھی مطالبہ کیا گیا۔
جرگے کے صدر ناصر خان بنگش نے میڈیا سے گفتگو کرتے ہوئے کہا کہ وزیراعلیٰ نے ہمارے تمام مطالبات سن لیے اور کہا کہ مطالبات سے متعلق ایپکس کمیٹی کا اجلاس بلایا جائے گا۔ انہوں نے بتایا کہ وزیراعلیٰ نے کہا کہ ایپکس کمیٹی کے اجلاس میں جرگے کے 5 اراکین بھی شرکت کریں گے اور ایپکس کمیٹی اجلاس میں مطالبات پر غور کیا جائے گا۔
