پاکستان تحریک انصاف خیبر پختونخوا کے رہنما اور رکن قومی اسمبلی جنید اکبر کے خلاف نیشنل سائبر کرائم انویسٹی گیشن ایجنسی میں مقدمہ درج کر لیا گیا، مقدمہ ریاست کی مدعیت میں درج کیا گیا جس میں مختلف دفعات شامل ہیں ۔
اسلام آباد: تھانہ این سی سی آئی اے سائبر کرائم رپورٹنگ سینٹر میں ایف آئی آر کردی گئی ہے، ایف آئی آر نمبر 152/2026 ریاست کی مدعیت میں درج کی گئی، مقدمے میں جنید اکبر کی ویڈیو میں مبینہ دھمکی آمیز بیان کا حوالہ دیا گیا ہے ۔
پی ٹی آئی رہنما کے خلاف مقدمہ پیکا ایکٹ کی دفعات 9، 10 اور 11 کےتحت درج کیا گیا، جس میں کہا گیا کہ جنید اکبر کے بیان میں اسلام آباد کو سومنات بنانے کی بات کی گئی، بیان سے خوف و ہراس اور عوامی تحفظ کو خطرہ پیدا ہوا ۔
ایف آئی آر کے مطابق جنید اکبر پر مبینہ طور پر اینٹی سٹیٹ مواد اور بیانیہ پھیلانے کا الزام ہے، جنید اکبر نے مبینہ طور پر اپنے آفیشل ٹک ٹاک اکاؤنٹ سے مواد شیئر کیا، ان کے ٹک ٹاک اکاؤنٹ کےتقریباً 3 لاکھ 39 ہزار 5 سو فالوورز ہیں ۔
