وزیر اعلیٰ خیبر پختونخوا محمد سہیل آفریدی نے ضلع کرم کا دورہ کیا جہاں انہوں نے حالیہ آپریشن سے متاثرہ افراد کے لیے امدادی پیکیج ایک لاکھ 10 ہزار روپے سے بڑھا کر 2 لاکھ 30 ہزار روپے کرنے کا اعلان کیا۔
وزیر اعلیٰ نے کہا کہ وہ بے گھر افراد جو میزبان گھروں میں مقیم ہیں، انہیں بھی امدادی پیکیج فراہم کیا جائے گا تاکہ کوئی بھی متاثرہ خاندان حکومتی امداد سے محروم نہ رہے۔ انہوں نے قبائلی بے گھر افراد کے دوہرے پتے (ڈبل ایڈریس) کے مسئلے کو حل کرنے کا اعلان بھی کیا۔
سہیل آفریدی کا کہنا تھا کہ ضلع کرم کے تمام متاثرین کو ضلع خیبر کے متاثرین کے طرز پر امداد فراہم کی جائے گی اور امدادی عمل میں شفافیت کو یقینی بنایا جائے گا۔
وزیر اعلیٰ نے اس موقع پر کہا کہ ہمیں ایک مہذب قوم کی طرح باہمی اور فرقہ وارانہ اختلافات کو بھلا کر ترقی اور خوشحالی پر توجہ مرکوز کرنی چاہیے۔ انہوں نے یقین دہانی کرائی کہ حکومت متاثرین کی بحالی اور فلاح و بہبود کے لیے ہر ممکن اقدامات کرے گی۔
