کرکٹ آسٹریلیا نے خاتون کرکٹر کے ساتھ غیر مناسب رویے پر سابق سری لنکن کرکٹر دلیپ سمارا ویرا پر 20 سال کی پابندی لگا دی۔
غیر ملکی خبر رساں ادارے کے مطابق ، سابق سری لنکن کرکٹر اور وکٹوریہ ویمن ٹیم کے سابق کوچ دلیپ سمارا ویرا پر یہ الزام عائد کیا گیا ہے کہ جب وہ کرکٹ وکٹوریہ کے ساتھ منسلک تھے تو اس دوران انہوں نے کوڈ آف کنڈکٹ کی خلاف ورزی کی، اور وہ غیر مناسب رویے کے مرتکب قرار پائے گئے جس کی وجہ سے ان پر پابندی لگائی گئی۔
رپورٹس کے مطابق ، سابق سری لنکن کرکٹر دلیپ سمارا ویرا نے خاتون کرکٹر کے ساتھ غیر مناسب رویے اپنایا ـ جس کی وجہ سے ان پر 20 سال کے لیے پابندی لگائی گئی ہے اور سابق کرکٹر کرکٹ آسٹریلیا یا ریاستی کرکٹ میں کوئی عہدہ نہیں سنبھال سکیں گے۔
کرکٹ وکٹوریہ کے سی ای او نے اپنے بیان میں کہا کہ کرکٹ آسٹریلیا اور کرکٹ وکٹوریہ تمام کھلاڑیوں کے لیے محفوظ ماحول مہیا کرنے پر یقین رکھتی ہے اور غیر مناسب رویے کا شکار ہونے والی خاتون کرکٹر کو اس کی بہادری پر داد دیتی ہے کہ انہوں نے غلط کے خلاف آواز اٹھائی ـ
دلیپ سمارا ویرا نے 90 کی دہائی کے آغاز میں سری لنکا کے لیے 7 ٹیسٹ اور 5 ون ڈے میچز کھیلے، انہوں نے 2008 میں بیٹنگ کوچ کی حیثیت سے کرکٹ وکٹوریہ کے ویمن پروگرام کو جوائن کیا۔
سمارا ویرا کو اس سال مئی میں وکٹوریہ کے ویمن ٹیم کا فل ٹائم کوچ مقرر کیا گیا مگر انہوں نے چند دن بعد ہی اپنے عہدے سے استعفیٰ دے دیا تھا۔
