پشاور (حسن علی شاہ) — تقریباً دو ہفتے قبل وفاقی وزیر اویس لغاری نے ٹیلی ویژن پر آکر پرجوش انداز میں اعلان کیا تھا کہ اب ملک میں لوڈشیڈنگ کا خاتمہ کر دیا گیا ہے، جسے عوام کے لیے ایک بڑی خوشخبری قرار دیا گیا۔
تاہم ان کے اس اعلان کے چند ہی دن بعد ملک بھر خصوصاً خیبرپختونخوا میں غیر اعلانیہ اور طویل دورانیے کی لوڈشیڈنگ کا سلسلہ دوبارہ شروع ہو گیا، جو تاحال جاری ہے۔
خیبرپختونخوا کے کسی بھی ضلع، تحصیل یا گاؤں میں صورتحال مختلف نہیں، جہاں روزانہ کئی کئی گھنٹوں کی غیر اعلانیہ لوڈشیڈنگ کی جا رہی ہے، جس سے عوام کی زندگی بری طرح متاثر ہو رہی ہے۔
عوامی حلقوں کا کہنا ہے کہ ایک جانب بجلی کے بلوں میں مختلف ٹیکسز کا اضافہ کیا جا رہا ہے جبکہ دوسری جانب مسلسل لوڈشیڈنگ نے زندگی کو مزید مشکل بنا دیا ہے۔ شہریوں نے اس صورتحال کو بنیادی انسانی حقوق کی سنگین خلاف ورزی قرار دیتے ہوئے شدید ردعمل کا اظہار کیا ہے۔
