ہنگو کے علاقے خزینہ پولیس چیک پوسٹ پر دہشت گردوں کے حملے میں شہید ہونے والے پولیس اہلکاروں کی نمازِ جنازہ مختلف علاقوں میں سرکاری اعزاز کے ساتھ ادا کر دی گئی، جبکہ انہیں ان کے آبائی علاقوں میں سپردِ خاک کر دیا گیا۔
شہید اسسٹنٹ سب انسپکٹر کفایت اللہ خان برکی کی نمازِ جنازہ پشاور کے علاقے ارمڑ پایان میں ان کے آبائی قبرستان میں ادا کی گئی، جس کے بعد انہیں وہیں سپردِ خاک کر دیا گیا۔ شہید کفایت اللہ اپنے پیچھے تین کمسن بچوں کو سوگوار چھوڑ گئے ہیں، جن میں دو بیٹے اور ایک بیٹی شامل ہیں۔
دوسری جانب، ہنگو کے علاقے خزینہ میں دہشت گردوں کے خلاف کارروائی کے دوران شہید ہونے والے پولیس اہلکار ثناء اللہ کی نمازِ جنازہ ان کے آبائی گاؤں لاچی میں سرکاری اعزاز کے ساتھ ادا کی گئی۔ پولیس کے چاک و چوبند دستے نے شہید کو سلامی پیش کی، قبر پر پھول چڑھائے اور ان کی عظیم قربانی کو خراجِ عقیدت پیش کیا۔
ادھر گزشتہ روز ہنگو آپریشن میں شہید ہونے والے ضلع دیر زیریں سے تعلق رکھنے والے سپاہی عبدالسعید شہید کی نمازِ جنازہ ان کے آبائی گاؤں دشخیل کاٹن، تحصیل تالاش میں ادا کی گئی۔ بعد ازاں انہیں مکمل سرکاری اعزاز کے ساتھ سپردِ خاک کر دیا گیا۔
