گوادر: مئی کے آغاز پر گوادر بندرگاہ پر ٹرانس شپمنٹ کارگو بردار جہاز لنگر انداز ہو گیا ہے جس سے بندرگاہ پر تجارتی سرگرمیوں کا تسلسل برقرار ہے۔
حکام کے مطابق ایم وی شو لانگ نامی جہاز میں 16 ہزار 77 میٹرک ٹن کارگو موجود ہے۔
وفاقی وزیر برائے بحری امور جنید انوار چوہدری کا کہنا ہے کہ خطے کی موجودہ صورتحال کے باعث جہاز کا رخ گوادر کی جانب موڑا گیا۔
انہوں نے بتایا کہ جہاز کی برتھنگ اور کارگو ہینڈلنگ کا عمل تیزی سے جاری ہے۔
ان کے مطابق گوادر بندرگاہ متبادل تجارتی روٹس میں اہم مقام حاصل کرتی جا رہی ہے۔
جنید انوار چوہدری کے مطابق اپریل کے دوران گوادر بندرگاہ پر چار ٹرانس شپمنٹ جہازوں کی آمد ریکارڈ کی گئی، جبکہ علاقائی بحری صورتحال کے باعث بندرگاہ کی اسٹریٹجک اہمیت میں مزید اضافہ ہوا ہے۔
وفاقی وزیر نے مزید کہا کہ گوادر عالمی تجارت کے لیے ایک قابل اعتماد مرکز بنتا جا رہا ہے۔
ماہرین کے مطابق گوادر بندرگاہ کی ترقی نہ صرف پاکستان کی معیشت کے لیے اہم ہے بلکہ یہ خطے میں تجارتی روابط کو بھی مضبوط بنانے میں کلیدی کردار ادا کر رہی ہے۔
