سکیورٹی ذرائع نے بلوچستان میں گزشتہ رات مختلف مقامات پر دہشتگردوں کی جانب سے حملے کیے جانے کا دعویٰ کیا ہے۔ ذرائع کا کہنا ہے کہ سکیورٹی فورسز اور قانون نافذ کرنے والے اداروں نے اِن حملوں کا مؤثر جواب دیا اور 12 دہشتگرد جہنم واصل کر دئیے۔ سکیورٹی ذرائع کا کہنا ہے کہ دہشتگردوں کے خاتمے تک سکیورٹی فورسز کے آپریشن جاری رہیں گے۔
یاد رہے کہ گزشتہ رات بھی دہشتگردوں نے بلوچستان کے علاقوں قلات اور موسیٰ خیل میں بزدلانہ حملے کر کے شہریوں اور فورسز کے جوانوں کو شہید کیا۔ موسیٰ خیل میں پنجاب سے تعلق رکھنے والے 23 افراد کو گاڑیوں سے اتار کر شہید کیا گیا اور متعدد گاڑیوں کو نذر آتش بھی کیا گیا جبکہ قلات میں فائرنگ کر کے پولیس اور لیویز سمیت 10 افراد کو شہید کیا گیا۔
