تہران: ایرانی سیکیورٹی فورسز نے ملک کے مختلف شہروں میں کارروائیاں کرتے ہوئے مبینہ غیر ملکی جاسوسوں کو گرفتار کر لیا ہے۔ ایرانی میڈیا رپورٹس کے مطابق، گرفتاریاں مختلف شہروں میں کی گئیں، جن میں لرستان اور رے شہر شامل ہیں۔
تفصیلات کے مطابق، صوبہ لرستان میں پاسدارانِ انقلاب کی انٹیلی جنس یونٹ نے پانچ مبینہ جاسوس گرفتار کیے ہیں۔ ان افراد پر دشمن ممالک کے لیے جاسوسی کا الزام ہے، تاہم ان کی شناخت ظاہر نہیں کی گئی۔
اسی دوران، نیم سرکاری خبر رساں ایجنسی تسنیم کے مطابق، رے شہر میں ایرانی پولیس نے موساد سے وابستہ ایک مبینہ جاسوس کو گرفتار کیا ہے۔ رپورٹ کے مطابق، گرفتار شخص افغان شہری اور انڈر گریجویٹ طالب علم ہے، جس کے موبائل فون سے ڈرون اور بم بنانے سے متعلق تربیتی مواد برآمد ہوا ہے۔
ایرانی سیکیورٹی اداروں کا کہنا ہے کہ یہ تمام گرفتاریاں ملکی سلامتی کے خلاف سرگرمیوں کا حصہ تھیں، جنہیں ناکام بنا دیا گیا ہے۔
ادھر ایرانی بارڈرز کمانڈ کی جانب سے جاری بیان میں کہا گیا ہے کہ ہمسایہ ممالک سے توقع کی جاتی ہے کہ وہ اپنی سرزمین ایران کے خلاف کسی بھی دشمنانہ کارروائی کے لیے استعمال نہ ہونے دیں۔
بیان میں مزید کہا گیا کہ ایران کی بارڈر پولیس مسلح افواج کے تعاون سے سرحدی آمد و رفت پر مکمل کنٹرول رکھتی ہے اور ہر قسم کی مداخلت کا فوری جواب دیا جائے گا۔
