بیئرشیبہ (جنوبی اسرائیل): ایرانی بیلسٹک میزائل حملے میں اسرائیل کا سب سے بڑا اور مرکزی سوروکا میڈیکل سینٹر شدید تباہی کا شکار ہو گیا۔ یہ اسپتال جنوبی اسرائیل کے شہر بیئرشیبہ میں واقع ہے اور غزہ کی حالیہ جنگ میں زخمی ہونے والے اسرائیلی فوجیوں کے علاج کا مرکز تھا۔
ذرائع کے مطابق، ایران کی جانب سے داغا گیا میزائل براہ راست سوروکا میڈیکل سینٹر پر گرا، جس سے اسپتال کی عمارت کو شدید نقصان پہنچا۔ مختلف وارڈز مکمل طور پر منہدم ہو چکے ہیں جبکہ عمارت کے کئی حصے تباہ ہو چکے ہیں۔ حملے کے وقت درجنوں صیہونی فوجی اسپتال میں زیر علاج تھے۔
ابتدائی اطلاعات کے مطابق اس حملے میں متعدد افراد زخمی ہوئے ہیں تاہم ہلاکتوں کی تصدیق ابھی تک نہیں ہو سکی۔ اسپتال میں ہنگامی حالت نافذ کر دی گئی ہے اور مریضوں و طبی عملے کو فوری طور پر دیگر محفوظ مقامات پر منتقل کیا جا رہا ہے۔
سوروکا میڈیکل سینٹر کو جنوبی اسرائیل کا سب سے اہم اور مرکزی ہسپتال سمجھا جاتا ہے۔ اس پر حملہ نہ صرف اسرائیل کے طبی نظام پر ضرب ہے بلکہ جنگی زخمیوں کے علاج کے سلسلے کو بھی بری طرح متاثر کرے گا۔ ماہرین کا کہنا ہے کہ اس حملے کے اثرات اسرائیلی دفاعی اور طبی نظام پر طویل مدتی ہو سکتے ہیں۔
